Kreßdachsgeschenk
„Leeve Papp, wie do jo weiß
Bahl Hellig Ovend ess,
Un ich schenk, wie jedes Johr
Dir jet janz jeweß.
Ävver Hück, wat sähs do no,
Fällt mer jarnix en.
Weiß do jet, dann sach et meer,
Kütt dir jet en der Senn?“
„Leeven Jung, ich wöß do jet,
Wat mich räch wöödt freue.
Wöör nit düür un secherlich
Wööds do et nit bereue.
Zoehsch deis do verspreche meer,
Dat do nit wees versühme,
Die Zemmer en der nöchsten Zick
Vun selvs ens opzerühme.
Dann wöödtet räch jefalle meer,
Dat vun allein do och
De Hausaufjabe maachen däts,
Un och ens lies e Boch.
Jehorche, jo, do weiß et jo
,Fällt dir och mänchmol schwer.
Däts do dat ohne viill Buhei,
För mich jet Schönes wör.
Loß die Handy ens e Rauh,
Bliev vun der Flimmerkess.
Un no dem Spille op der Stroß
Pünklich zohus do bes.“
„Leeve Papp, hör op, hör op,
Bliev mer domet jestolle.
Do dun ich leever em Jeschäff
Dir fünf Zijarre holle.“
