(Geschichte: Markus Becker; gefunden im: Kölsches Kochbuch, Lüttgau Verlag)
Dä Dokter Kannebäcker wor em ahle Kölle ene ahjesehene Wissenschaffler. Hä hatt Medizin un Chemie studeet un dät en singem Labor an so verschiedene Saache wie Hostesaff un Ottekolong arbeide, woren hä – en alle Bescheidenheit – ziemlich jot wor. Koot: Dokter Kannebäcker wor en stadtbekannte Persönlichkeit. Ihm selvs wor dat (wie de miehste Wissenschaffler) drissejal, ävver sing Frau Emmi soch dat völlig anders. Weil, ihre Mann wor doch ene Dokter, ene Wissenschafffler, ene Entdecker – also „jet Besseres“. Un wemmer schon „jet Besseres“ ess, dann muss mer bestemmpte Erwartunge erfülle. Wäje dä Lück. Weil, die fange söns jo an zo schwaade, un sie, Kannebäckers Emmi, wör am Engk blameet. Deswäje wor se ängslich dodrop bedaach, dat ihre Mann möglichst nix verkeht maat. Sie soch zu, dat hä morjens singe Hoot nit verjesse dät, dat hä ene standesjemäße Anzoch anhatt uns sich rejelmäßich bei de „richtije Lück“ sin leet. Leider wor letzteres jet, womet d’r Dokter Kannebäcker wirklich övverhaup nix am Hötche hatt, hä jing leever nohm Bräues, öm en aller Rauh zwesche dä Kutscher un Rhingroller zwei, drei Kölsch zo drinke. En Saach, die dat Emmi unger jar keine Umständ dulde kunnt. Wenn hä schon drinke moot, dann Wing met enem Stadtrot oder enem Professor, ävver doch op keine Fall Kölsch met irjendswelche Kraade! Dat dät sich einfach nit schecke! Also dät dat Emmi ihrem Mann dä Besök em Bräues verbeede, und wenn en jestandene Neppeser Metzjersdochter wie et Emmi jet verbeede dät, dann wor dat wie et elfte Jebot.
För dä ärme Dokter Kannebäcker wor et nit leich. Einmol die Woch met irjendseinem strunzlangwielije Stadtrot un singer stiefstaatse Frau Wing drinke jing no noch, ävver nit mieh en d’r Bräues zo dürfe wor ech en Strof. Normalerwies hätt hä sujet jo einfach ignoreet, ävver et Emmi hatt jede Menge Fründinne, un so kunnt hä dovun ussjon, dat hä unger Beobachtung stunt. Zom Jlöck jov et ävver noch singe Assistent! Den däät keiner beachte, wenn hä met enem Krug nohm Bräues jingk! Also scheckte Dokter Kannebäcker singe Assistent nohm Reissdorf für Kölsch zo holle. Un weil hä en singem Labor weder Jläser noch Tasse hatt, wood dat Kölsch evvens uss Reajenzjläser jedrunke. Die dodrövver hinaus noch dä Vorteil hatte, dat se bei enem plötzlichen Kontrollbesök vum Emmi en perfekte Tarnung afjovve: Et Emmi kom nie op die Idee, dat die jäle Flüssigkeit en denne Reajenzjläser Kölsch wor.
Dokter Kannebäcker bewahrt si Jeheimnis si Levve lang. Eets als dä Dokter dut wor (un et Emmi en hochbetagte Frau) dät dä Assistent vum Dokter Kannebäcker dat Jeheimnis lüfte. Met däm Erjebnis, dat janz Kölle am jriemele wor: Dä Dokter wor also och en der Beziehung erfinderisch jewäs! Bei de Studente jalt et jetz als schick, Kölsch uss enem Reajenzjlas zo drinke, un bei der jelejenheit maat mer die Entdeckung, dat e schnell jezapp un schnell jedrunke Kölsch uss dem Reajenzjlas wesentlich besser schmecke dät wie Kölsch uss däm Bierhumpe. Jot, mer moot e paar Reajenzjläser mieh ussdrinke öm suvill Alkohol erenzokrieje wie bei einem Bierhumpe, ävver dat wor schleeßlich et kleinste Problem. Wichtich wor d’r Jeschmack! Also jinge die Studente hin un däte ihr Studentekneipe met Reajenzjläser für d’r Kölschusschank usstatte. Vun do uss kome die neue Jläser en die andere Brauhäuser un Weetschafte en Kölle, un dat wor die Jeburtsstund vun dä Kölschstang, in der hück traditzionell Kölsch ussjeschenk weed.
gesendet von Christa Commer
